Скорбнорадостные икосы ко Всесвятому и Живоприемному Спаса Гробу

 

 

(поемыя в Греческой Церкви)

 

Кондак 1

 

Живоприемному и честному Господню Гробу, ныне предстояще тщанием недостойнии, со Ангелы приносим Божественныя песни: да яко имеяй святость несравненную, освятит и нас сему припадающих и вопиющих: 

Радуйся, Гробе треблаженный.

 

Икос 1

 

Ангели невидимо присно страхом обстоят Христов треблаженный Гроб: и сей яко престол боголепный и источник света зряще, изумеваются и стоят, поюще сему сия:
Радуйся, Христов всесветлый Гробе; радуйся, врага мысленнаго разорение.
Радуйся, земли всея единое цветособрание; радуйся, православных всех украшение.
Радуйся, трапезо, носящая яко жертву Христа; радуйся, источниче, источающий верным примирение.
Радуйся, яко посреде вселенныя пребываеши; радуйся, яко славно небо превишаеши.
Радуйся, жизни безсмертныя держателю; радуйся, источниче нетления раздаятелю.
Радуйся, в нем же погребен бысть Творец; радуйся, им же просветися тварь.
Радуйся, Гробе треблаженный.

 

Кондак 2

 

Видя Аримафейская отрасль, яко безвестна есть неизбежная нужда смерти, в саду гроб себе нов уготова: но со креста Тя мертва снем, Господи, честне во оном тщится погребсти Тя, вопия Ти любовию: Аллилуиа.

 

Икос 2

 

Видением Божественным уведа Иосиф благообразный велие распятия действо: сего ради и к Пилату пришед рече: даждь ми пречистое Господне тело; яко же испроси и взят, в новом гробе положи, вопия ко Гробу сице:
Радуйся, страстей Спаса конец; радуйся, верных радостная часть.
Радуйся, нетления смертных делателище; радуйся, шатаний вражиих отражение.
Радуйся, небо земное, Божий престол образующее; радуйся, место небесное, в нем же Бог показася живый.
Радуйся, яко ты еси животочный источник; радуйся, яко был еси Христа Божественный одр.
Радуйся, Сиона горняго возсоздание; радуйся, верных крепкое воззвание.
Радуйся, сосуд исполнь богословия; радуйся, разрешителю всякаго словопрения.
Радуйся, Гробе треблаженный.

 

Кондак 3

 

Силу Твою Божественную Иосиф стяжав, отложи страх Еврейский, и со креста тело Твое снят с Никодимом, смирною и алоем, Христе, умасти, с ним же честне погреб Тя, воспе с любовию:Аллилуиа.

 

Икос 3

 

Имущи Дева в душе оружие печали, якоже Симеон прорече, гробу Сына предстоящи, жалостне восклицаше, и сей орошающи слезами, вопияше сия:
Радуйся, из него же радость произыде; радуйся, чрез него же тля отыде.
Радуйся, благочестивых основание и утверждение; радуйся, нечестивых падение и сотрение.
Радуйся, Гробе всеблаженне Сына Моего Христа; радуйся, одр краснейший Жениха мысленнаго.
Радуйся, ибо содержал еси Содержащаго вся; радуйся, ибо не удержал еси Правящаго вся.
Радуйся, звезда, показующая Солнце; радуйся, свещниче, облистаяй подсолнечную.
Радуйся, Огня нестерпимаго приятелище; радуйся, Света невечерняго хранителище.
Радуйся, Гробе треблаженный

Кондак 4

Бурю имуще печали, мироносицы жены не хотяху гроба отстати: радость бо в нем сокрыся: сего ради и всю нощь соскорбети Матери Иисусовой потщашася: но да по закону субботствуют, возвратишася вопиющия сице: Аллилуиа.

 

Икос 4

 

Слышавше христоубийцы Тебе, Христе, предрекающа онем, яко от мертвых востанеши, и притекше к Пилату просиша Твой гроб запечатати и кустодиею стрещи: но мы, сему предстояще, вопием любовию:
Радуйся, иже больший из всех предметов поклонения; радуйся, текущий источник чудес.
Радуйся, колеблемых неколеблемая опора; радуйся, Церкве незыблемое утверждение.
Радуйся, державо Божества, возблиставшая от земли; радуйся, полното святыни, святящая всю землю.
Радуйся, труждающияся святыя укрепляющий; радуйся, обремененныя верныя облегчающий.
Радуйся, имже Еврее отложишася; радуйся, имже языцы жребий улучиша.
Радуйся, адово вреждение и огорчение; радуйся, смертных всех спасение.
Радуйся, Гробе треблаженный.

 

Кондак 5

 

Богоборцы показавшеся, христоубийцы одержими бяху завистию, людие Еврейстии, иже и запечатавше гроб, окружиша кустодиею, яко мертва стрежаху и яко льстива поношаху Тя, Долготерпеливе, неведуще глаголати: Аллилуиа.

 

Икос 5

 

Видеша свет стрегущии, с небесе возсиявший неизреченно во гробе Господни: и камень от сего трусом отвален узревше, смятошася и содрогошася, яко мертвы бывше, гробу же сотник рече:
Радуйся, славо спасаемых; радуйся, надеждо ненадеемых.
Радуйся, Христоименитых людей утверждение; радуйся, убогих неистощимый дар.
Радуйся, яко вселися Божество в тебе; радуйся, яко величается Сиона ограждение в тебе.
Радуйся, иже всю скверну от душ омывающий; радуйся, иже вся стрелы вражия притупляющий.
Радуйся, имже разрешися осуждение; радуйся, имже показася воскресение.
Радуйся, в немже благочестивии утверждаются; радуйся, в немже нечестивии низвергаются.
Радуйся, Гробе треблаженный.

Кондак 6

 

Проповедницы бывше стрегущии гроб, возвратишася во град святый, возвещающе ясно Иудеем всем, яже во гробе видеша явная чудеса, но сии яко тщетная паки завистию та вмениша, и не послушаша рещи: Аллилуиа.

 

Икос 6

 

Возсиял еси от гроба свет веселия, разгнав мрак печали, и воскрес бо тридневен, всякую, Спасе, от земли отъял еси слезу: мы же, просветившеся, Твоему гробу радостно вопием сия:
Радуйся, радосте рода человеческаго; радуйся, пагубо врагов многоразличных.
Радуйся, сущих в болезнех врачевство спасительное; радуйся, сущих во аде душ свобождение.
Радуйся, тобою бо облекохомся обнаженнии Адамом; радуйся, тобою бо обезсмертихомся умерщвленнии сатаною.
Радуйся, его же кит Ионы образует; радуйся, его же кладязь Иосифа показует.
Радуйся, хромыя глезне исправляющий; радуйся, красных полноту дарствующий.
Радуйся, исполняяй благочестивыя благопоспешества; радуйся, уловляяй нечестивыя из неведения.
Радуйся, Гробе треблаженный.

 

Кондак 7

Всуе Еврейстии потщашася людие востание Христово отринути, аще бо и довольны воином даша сребренники, но Лонгин сие ясно возвести, безстрашно вопия: Аллилуиа.

 

Икос 7

 

Новую показа радость воскресый из гроба Христос нам, иже от Него просвещенным, еже мертвых чаяти воскресения, жизни века грядущаго и света неприступнаго; Его же гроб видяще, любовию поем сице:
Радуйся, востание падших; радуйся, отпущение преткнувшихся.
Радуйся, источающий всем благочестие; радуйся, разгоняющий языков нечестие.
Радуйся, яко исполнихомся в тебе всеми благими; радуйся, яко пием от источников твоея сладости.
Радуйся, его же образует честная купель; радуйся, из него же изливаются благодатию токи.
Радуйся, в немже погребен бысть Безсмертный; радуйся, имже отъяся смерть.
Радуйся, имже просвещается тварь; радуйся, имже покланяется Творец.
Радуйся, Гробе треблаженный.

 

Кондак 8

 

Странное чудо видяще, смутишася зело заутра мироносицы пришедшия: иже бо при двери сый гроба велий зело камень, страшным трусом отвален бысть: Ангел же, на сем седяше, онем вопия: Аллилуиа.

 

Икос 8

 

Весь радость и источник веселия сый, еже радуйтеся мироносицам рекл еси: яже Твоя пречистыя нозе объемше, честне со слезами лобызаху и любовию ко гробу реша:
Радуйся, утешение печалующих; радуйся, укрепление немощных.
Радуйся, Апостолов всемирное проповедание; радуйся, песнописцев просвещение и утверждение.
Радуйся, яко востание Христово являеши; радуйся, яко падение Адамово исправляеши.
Радуйся, неверных скорый потребителю; радуйся, колеблющихся сладкий водителю.
Радуйся, в немже благочестивии собираются; радуйся, имже и мертвии воставляются.
Радуйся, радосте вещественных и невещественных; радуйся, пагубо поганых и нечистых.
Радуйся, Гробе треблаженный.

 

Кондак 9

 

Весь чин Ангельский пристрашен бысть, зря Тя, Спасе, во гробе спяща: в третий же день, воставша боголепно видев, смертным рай вместо ада даровавша, воспе вопия: Аллилуиа.

 

Икос 9

 

Глаголы иже во гробе седящих Ангел слышавше, мироносицы девы, яко от гроба востал еси глаголющих, вси, Спасе, радости исполнишася, и сему проглаголаша любовию:
Радуйся, похвало богословия; радуйся, богатство Сиона святаго.
Радуйся, Ангелов чудо многопетое; радуйся, демонов язва многоболезненная.
Радуйся, труба, изъясняющая благочестия силу; радуйся, море, потопившее нечестия множество.
Радуйся, егоже сонмы Ангел обстоят; радуйся, ему же множества смертных покланяются.
Радуйся, имже падший воста; радуйся, имже Агарь дивится.
Радуйся, решителю страшных страстей; радуйся, подателю Божественных даров.
Радуйся, Гробе треблаженный.

 

Кондак 10

 

Спасти хотя от ада человеческий род, снисшел еси душею даже до сего: и узники блистанием Твоего Божества света исполнишася, изведени же бывше вси, со пророки и праведники, воспеша, вопиюще Ему: Аллилуиа.

 

Икос 10

 

Ко гробу Иоанн с Петром текуще, предсташа заутра во тме и чрез иже в нем Божественнаго света, видяще пелены, и сударь особ от них лежаща, радости многия исполнишася, удивившеся и к сему реша:
Радуйся, хладныя сердца согревающий; радуйся, пути верным освещающий.
Радуйся, исполнивый света Божественнаго вся; радуйся, показавый благочестия клепала.
Радуйся, зерцало небесное, Божественный свет отражающее; радуйся, ведение даруяй тайн Богоначальных.
Радуйся, помышление сущих во тме просвещаяй; радуйся, сердца сущих в жажди орошаяй.
Радуйся, имже вся обновишася; радуйся, в немже образи совершишася.
Радуйся, имже объюроде мудрость; радуйся, имже умудрися юродство.
Радуйся, Гробе треблаженный.

 

Кондак 11

 

Песнь утру глубоку Тебе утреннююще, Спасе, приносим тепле вместо мира, покланяющеся страхом Твоему Живоносному Гробу, Царю Святый, егоже показал еси нам источник, Слове, милостей Твоих Тебе вопиющим: Аллилуиа.

 

Икос 11

 

Светоносный Твой гроб паче солнца, Спасе, возсиявый от земли видящи в радости Елена, падши поклонися, любовию и изумления исполнившися, Тя воспевает, вопиюще ко гробу сия:
Радуйся, радосте и надеждо мира; радуйся, свете души и ума моего.
Радуйся, православных царей величание; радуйся, Патриархов благочестивых венчание.
Радуйся, яко тя проповедают благочестивии Архиереи; радуйся, яко тя славят благоговейно Иереи.
Радуйся, правило и образ добродетели монашествующих; радуйся, покрове и образ иже к тебе прибегающих.
Радуйся, воинства вернаго ограждение; радуйся, нас всех надписание.
Радуйся, мысленнаго вертограда гроб; радуйся, онаго многоплодная ветве.
Радуйся, Гробе треблаженный.

 

Кондак 12

 

Радующися обретению тебе, о всечестный Гробе, Божественная царица Елена, преизрядный велий зело храм верху тебе созда: мы же присно обстояще тя, иже в тебе Погребенному поем:Аллилуиа.

 

Икос 12

 

Поюще с веселием, воспеваем тя любовию, о Гробе Христов светоносне: иже во всем невместимый Богочеловек Господь, в тебе погребен быв тридневен, освяти, прослави и вся научи вопити ти сице:
Радуйся, неизреченнаго совета предел; радуйся, непобедимый верных рог.
Радуйся, Богословов славных проповедание; радуйся, учителей честных оглашение.
Радуйся, яко Невместимый вместися в тебе; радуйся, яко и тридневен воста от тебе.
Радуйся, Боговедения реки измываяй; радуйся, Богочтения потоки источаяй.
Радуйся, народом многим хвалимый; радуйся, верным Иереем воспеваемый.
Радуйся, верным заключивый адово зияние; радуйся, им бывый новая песнь.
Радуйся, Гробе треблаженный.

 

Кондак 13

 

О Божий Боже Слове, невместимый естеством во всей, Жизнодавче, твари, како в сем вместился еси Гробе; но убо моления наша приими, Благоутробне, и вечныя свободи муки Тебе вопиющих: Аллилуиа.

Сей кондак чтется трижды. И паки чтутся икос 1 и кондак 1.